” ————————————————————-
السلام عليكم ورحمة الله وبركاته
قال الله تعالى في محكم تنز يله: (( قل هل يستوى الذين يعلمون والذين لايعلمون))
ويقول الرسول صلوات الله وسلامه عليه: ((اطلبوا العلم ولو بالصين، فإنّ طلب العلم فريضة على كل مسلم))
الموضوع اللى انا حابه ان كلنا نتكلم فيه هنا هو عن الدراسات العليا…سواء كنا وصلنا لها او لاء، يعنى لو الحلم ده اتحقق يبقى ياريت تفيدنا وتحكي لنا الخطوات والمصاعب اللى قابلتك، اما بقى لو طريقك ده قابلته عثرات زي حالاتى كده يبقى ياريت تدخل وندردش ونشوف هنعمل ايه…ماهي مش نهاية العالم 
وهفكركم بجمله مهمه جداااااااااااااا
لاتصدق ان الاحلام بلاثمن…فبعض الاحلام ثمنها العمر
حرام تضيع عمرك وتسيب حلمك يحققه غيرك وتقنع نفسك بكلام ومسكنات علشان تموت الحلم ده جواااك
انا هعرفكم بنفسي الاول وبعدين ابقى احكي لكم عنى بس اتمنى بجد ان عدد الناس المهتمين بالموضوع ده يدخلوا ويفيدوا بعض
انا مدرسة لغة إنجليزية من مصر وبالتحديد من مدينة الاقصر
اتخرجت من كلية التربيه سنة 2005 ومش محتاجه اقولكم انى دخلتها من غير رغبتي لاء برغبة البيه التنسيق..كلام فااات اوانه وملوش اي لازمه بس يمكن مبرر انى جبت تقدير عام (مقبول) في الاربع سنين وبالتحديد مقبول في اولى وتانيه وجيد في تالته وجيد جداا في رابعه…تقريبا ناقص لى 5% واجيب الجيد
ليه التفاصيل دي كلها هقولكم بس بالرااحه وطولوا بالكم معايا
بعد مااتخرجت كملت على طول دراسات عليا وعندنا في تربيه بتبقى دبلومات وبعدين ماجيستير ودكتوراه اخدت اول دبلومه سنة 2006 بتقدير امتياز وبترتيب السادس على الدبلومات وكانت في تخصص تكنولوجيا التعليم، ولله الحمد، وفي السنه اللى وراها على طووول في 2007، حصلت على دبلوم خاص في مناهج وطرق تدريس اللغة الانجليزيه وبتقدير جيد جدااا ولله الحمد
لحد هنا وافتكرت ان الدنيا خلاص صالحتنى وضحكت لى واعطتنى كل مااتمناه
حبيت اقدم على الماجيستير في اقرب جامعة لى اللى هي جامعة جنوب الوادي اللى درست فيها كل دراستي الجامعيه لكن للاسف مجلس الجامعه اخد قرار في شهر 4 من سنة 2006 بوقف الموافقه على طلبات الماجيستير من الطلاب الحاصلين على اقل من تقدير جيد
في التقدير العام للاربع سنين يعني بالعربي جايبين مقبول زييي
اتصدمت وزعلت شويه بس رجعت قلت مش مشكله انا هقدم في جامعة المنيا ودي جامعة كويسه فوجئنا ان الجامعه اصدرت قرار بوقف قبول الطلاب للدراسات العليا من خارج الجامعه
اتصدمت جدااااااااا والدنيا اسودت وبجد حسيت انه ياريت كنت بطلت احلم يمكن لو مت من وقف الاحلام كان ارحم ان اشوف حلمي يموت امامي وانا واقفه بتفرج
بس طبعا الفرصه متاحه في جامعتين عين شمس وحلوان…لكن لانى مش حابه اطول عليكم..هقولكم ايه اللى حصل معايا بعد اما تدخلوا وتشرفوا مدونتي
في انتظار زيارتكم اللى اكيد هتسعدنى…وفي انتظار تعليقاتكم اللى اكييييد تهمني
المزيد
ـــــــــــــــــــــــــــــــــــــــــــــــــــــــــ
التصنيفات : غير مصنف |
